Taliyaha Ciidanka Boliiska, S/Guuto Asad Cismaan Cabdullaahi, ayaa maanta tababar usoo xiray 50 askari oo ah dhiig cusub oo lagu soo kordhiyay qeybta Nabadgalyada Wadooyinka ee Taraafikada. Ciidankan cusub ayaa ka mid ah dadaallada lagu kor dhinaayo tirada iyo tayada ciidanka boliiska Soomaaliyeed.

Taliyaha ayaa kula dar-daarmay ciidanka cusub in ay si hufan ugu adeegaan bulshada Soomaaliyeed, iyagoo ku shaqeynaya anshax, akhlaaq iyo qiyamka boliisnimada ee aasaaska u ah ciidanka. Wuxuu xusay muhiimadda ay leedahay in ay noqdaan kuwo ka shaqeeya horumarinta iyo sugidda nabadgelyada wadooyinka, maadaama ay yihiin qeyb muhiim ah oo ka mid ah adeegyada bulshada.

Sidoo kale, Taliyaha ayaa u rajeeyay ciidankan cusub in ay door muhiim ah ka qaataan yareynta cariiriga iyo hagaajinta isku socodka gaadiidka ee wadooyinka, taas oo qeyb ka ah istaraatiijiyadda lagu hagaajinayo nabadgalyada wadooyinka dalka.