Taliyaha Ciidanka Boliiska Soomaaliyeed Sarreeye guuto Asad Cismaan Cabdullaahi ayaa xafiiskiisa kulan kula qaatay Safiirka Dawladda Turkiga u fadhiya Soomaaliya Mudane Alper Aktaş.

Kulanka Taliyaha iyo Safiirka ayaa looga hadlay xoojinta xiriirka Boliiska iyo Safaaradda oo iyadu masuul uga ah Dawladda Turkiga taageerada ciidamada Boliiska ee dhinacyada Tababarka , taakulada iyo kor u qaadista aqoontooda .

Sarreeye Guuto Asad Cismaan Cabdullaahi oo Dawladda Turkiga uga mahadceliyey taageerada iyo tababar siinta ciidamada Boliiska Soomaaliyeed ayaa safiirka kala hadlay dib u habeynta, kordhinta tirada, agabka iyo dhismaha xarun u gaar ah ciidamada Haramcad oo qayb ka ah Boliiska Soomaaliya una xilsaaran sugidda Amniga iyo ka hortagga falalka guracan.